کوئٹہ :  ’’سلگتابلوچستان’’ کے پہلے ایڈیشن نے بلوچستان، سندھ، پنجاب اور کے پی کے شہروں میں تہلکہ مچادیا۔ ایک مہینے کے عرصے میں پہلے ایڈیشن کی تمام کاپیاں فروخت ہوگئیں۔ اس طرح ’سلگتابلوچستان‘‘ رواں سال پاکستان کی بیسٹ سیلنگ کتاب ثابت ہوئی۔

جس نے تمام کتابوں کی فروخت کا ریکارڈ توڑد یا۔ کتاب کے مصنف عزیز سنگھور ایک کالم نویس، صحافی اور ڈاکومنٹری فلم میکر ہیں۔ عزیز سنگھور ’’سلگتابلوچستان’’ میں بلوچستان کی واحد اور موثر آواز بن کر سامنے آئے ہیں۔ عزیز سنگھور کے آرٹیکلز کی بنیادی خصوصیات میں ایک یہ ہے کہ ہر موضوع کو اس کے تاریخی پس منظر، موجودہ صورتحال اور مستقبل میں اس سے مرتب ہونے والے اثرات کا جائزہ لیا گیا۔

’’سلگتابلوچستان’’ روزنامہ آزادی، کوئٹہ میں چھپنے والے کالموں کا مجموعہ ہے۔ جس کو علم و ادب پپلشر کراچی اور روزنامہ آزادی نے مشترکہ طورپر شائع کیا ہے۔’’سلگتابلوچستان’’ میں بلوچ قوم کی تاریخ،مسائل اورسیاست کانچوڑ موجود ہے۔

کتاب بلوچوں کی تاریخ کے حوالے سے ایک دستاویزکی حیثیت اختیارکر گئی۔ عزیز سنگھور کے کالمز روزنامہ آزاد ی سے قبل ڈان کراچی،نیشن لاہور،ڈیلی ٹائمز لاہورسمیت انگریزی اخبارات میں شائع ہوتے رہے ہیں۔ عزیزسنگھور کے کالمزکی خوبی ان کے موضوعات کاتنوع،بے باک ،بے لاگ اوراستدلال اوردلائل پر مبنی اسلوب ہے۔وہ بلوچستان کے سماجی،معاشرتی ڈھانچے سے بخوبی واقف ہیں۔بلوچ قوم کی نفسیات،سرداری نظام کی خامیوں اور خوبیوں،پورے صوبے کے ایک ایک ضلع کی جغرافیائی اورقبائلی صورتحال بھی ان کی آنکھ سے اوجھل نہیں ہے۔’’سلگتابلوچستان’’ کے دوسرے ایڈیشن کی تیاری جاری ہے۔