کوئٹہ میں فائرنگ کے ایک واقعے میں کم از کم چار افراد ہلاک ہو گئے ہیں۔ پولیس کے مطابق یہ واقعہ ہزار گنجی کے علاقے میں پیش آیا جہاں نامعلوم افراد نے سبزی فروشوں کو نشانہ بنایا۔
حکام کا کہنا ہے کہ ہلاک ہونے والے افراد کا تعلق ہزارہ برادری سے ہے، جبکہ زخمیوں کو قریبی ہسپتال منتقل کر دیا گیا ہے۔ سیکیورٹی فورسز نے علاقے کو گھیرے میں لے کر تفتیش شروع کر دی ہے۔
واقعے کے بعد ہزارہ برادری کے افراد نے احتجاج کرتے ہوئے مغربی بائی پاس کو ٹریفک کے لیے بند کر دیا ہے، جس کے باعث شہر میں آمدورفت متاثر ہوئی ہے۔
پولیس کا کہنا ہے کہ حملہ آوروں کی تلاش جاری ہے اور واقعے کی مختلف پہلوؤں سے تحقیقات کی جا رہی ہیں۔