کراچی: تحریک انصاف کے چیرمین عمران خان قومی اسمبلی کے حلقہ این اے 246 کا دورہ کرنے کے لئے دیگر رہنماؤں کے ہمراہ روانہ ہوگئے ہیں۔ تحریک انصاف کے جاری کردہ شیڈول کے مطابق تحریک انصاف کے چیرمین عمران خان جلوس کی شکل میں کارساز سے سوک سینٹر پہنچیں گے۔ عمارن خان کی سربراہی میں کارکن  ریلی کی شکل میں غریب آباد سے حسین آباد اور مکا چوک سے ہوتے ہوئے جناح گراؤنڈ پہنچیں گے جس کے بعد ان کی ریلی واٹر پمپ سے ہوتے ہوئے کریم آباد پہنچے گی جہاں عمران خان خطاب کریں گے۔ ریلی کے سلسلے میں پولیس نے تمام انتطامات مکمل کرلئے ہیں، لالو کھیت سے واٹر پمپ تک ایک ہزار اہلکار تعینات کئے گئے ہیں اس کے علاوہ بم ڈسپوزل اسکواڈ نے بھی کسی  ناخوشگوار واقعے سے نمٹنے کے لئے علاقے کی سوئپنگ کی ہے۔ لالو کھیت سے کریم آباد آنے والی سڑک ٹریفک کےلیے بند کردی گئی ہے جب کہ متبادل روٹ کے طور پر ٹریفک کو پل سے گزرنے کی ہدایت کی گئی ہے۔ دوسری جانب این اے 246 پر تحریک انصاف کے امیدوار عمران اسماعیل کا کہنا تھا کہ تحریک انصاف کو اللہ تبارک و تعالیٰ کے علاوہ کسی کی مدد نہیں چاہئے، ہم نے نہ تو پہلے کبھی ایم کیو ایم سے مدد مانگی اور نہ اب مانگیں گے، وہ ایم کیو ایم کی جانب سے تعاون کی پیشکش کا شکریہ ادا کرتے ہیں۔