کوئٹہ: بلوچستان میں تعلیم کے فروغ کے لیے ایک اہم پیش رفت کے طور پر، سینیٹر جان محمد بلیدی نے تربت، ضلع کیچ میں دانش اسکول کے قیام کے لیے وزیراعظم پاکستان کی منظوری حاصل کر لی ہے۔
سینیٹر بلیدی کی تجویز پر عمل کرتے ہوئے، وزیراعظم نے OGDCL کو ہدایت کی ہے کہ وہ اس منصوبے کی تعمیر اور قیام کے تمام اخراجات اپنی کارپوریٹ سوشل ریسپانسبیلیٹی (CSR) اسکیم کے تحت برداشت کرے۔منظوری کے بعد، سینیٹر جان محمد بلیدی نے ایگزیکٹو ڈائریکٹر او جی ڈی سی ایل ضیاء صلاح الدین سے ملاقات کی، جنہوں نے منصوبے کے لیے مکمل مالی تعاون کی یقین دہانی کرائی۔
انہوں نے تصدیق کی کہ او جی ڈی سی ایل اسکول کی تعمیر اور دیگر اخراجات مکمل طور پر برداشت کرے گا، اور منصوبے کی تکمیل کے بعد اسے پراجیکٹ ڈائریکٹر دانش اسکولز کے حوالے کر دیا جائے گا تاکہ اسے فعال بنایا جا سکے۔
ملاقات کے دوران، ایگزیکٹو ڈائریکٹر نے سینیٹر جان بلیدی نے اسکول کے لیے موزوں زمین کی نشاندہی اور فراہمی میں معاونت کی درخواست بھی کی۔یہ تاریخی اقدام جنوبی بلوچستان کے نوجوانوں کے لیے معیاری تعلیم تک مساوی رسائی کو یقینی بنانے کی جانب ایک بڑا قدم ہے، جو حکومتی عزم کو ظاہر کرتا ہے کہ پسماندہ علاقوں میں انسانی ترقی کے لیے عملی اقدامات کیے جائیں۔