ٹرمپ ءِ ہپت ملکانی اوشت ءُُ زارشانی
امریکہ ءِ نوک گچین بوتگیں صدر ڈونلڈٹرمپ ءَ وتی پاگواجہی تہت ءِ نندگ ءَ رند وتی اسل دروشم پیشدارگ بندات کتگ اَت۔درائیں دنیا ءَ ہمے زانتگ کہ ٹرمپ ءِ صدر گچین بوہگ آوکیں وہداں بلا بلائیں بدلی کار ءُُ اے گپ پدر بوت وہدے آئی ءَ امریکہ ءِ تہا ہپت مسلم ملکانی روآ ءِ سر پابندی جت ۔چشکہ آئیءِ اے جار ءَ امریکن بالی پٹ ءُُ زری پٹ ءُُ دگاں ہمک جاہاں ہما ہپتیں درے مسلم ملکانی مردمانی سرءَ پابندی ءَ رند بازیں دمگاں ایشیءِ ہلاپ ءَ رواناک ءُُ زارشانی درشان کتگ اَت اے درگت ءَ فرانس،برطانیہ ،ایران،پاکستان،عراق ءُُ اے دگہ ملکانی ایرجنی ءُُ زارشان درشان کنگ بوتگ ءُُ اے واہگ درشان کنگ بوتگ اَت کہ امریکی صدر ہمے زوتاں وتی جتگیں پابندیءَ ہلاس بہ کنت اگاں نا آوکیں وہداں ہمبندیں بازیں ملکاں گوں آئیءِ سیادی ءِ جاور ہراب بوت کن اَنت ۔اے تک ءَ برطانیہ ءِ پارلیمنٹ باسکاں اے جار ءِ ایرجنی کتگ ءُُ گشتگ کہ امریکی صدر اے ڈول ءَ ناشرکاری ءَ ہلاس نہ کنت بلکیں ناشرکاری ءَ گیش کنت ۔ءُُ اے ڈول ءَ بیرگ ءَ ہپت ملک ءِ نام گرگ بدپیلی زانگ بیت پرچکہ ناشرکارانی گوں ہچ ملک ءَ سیادی نیست ءُُ آ ہمک ملک ءَ است اِنت آہانی کار ایوک ءَ ایمنی ءِ ہلاس کنگ اِنت ءُُ امریکہ انوں سپر نیشنل پاور ملکے آئیءِ چشیں جار جنگ پہ اے دگہ ملکانی جاورانی ہراب کت کن اَنت ۔اے درگت ءَ عراقی صدر ءَ گشتگ کہ اگاں امریکہ ءِ صدر ءَ وتی اے بیان واپس نہ زرت گڈاں مئے ملک ءَ اوں انچیں جارے جنگ بیت ءُُ ایشیءِ تہا ایوک ءَ امریکی مردمانی آیگ ءِ پابندی کنگ بیت ۔اے ڈول ءَ ملکانی وت ماں وت ءَ جنگے بنا بوت کنت ءُُ چارمی مزن جنگ ءِ بو چست بوت کنت ،پمشکا امریکی صدر ٹرمپ بائد چشیں جار جنی ءَ پہریز بہ کنت۔دومی دست ءَ ہما مسلم ملکاں کہ اے پابندی جنگ بوتگ آئیءِ مردمانی زارشانی یک شل ءَ بربجاہ اَنت اے بابت ءَ امریکہ ءِ جند ءِ بازیں نندوک اوں وش ءُُ رازی نہ اِنت ۔ایشیءَ پیش اوں ٹرمپ ءِ صدر گچینی ءَ پیش سہب ءِ وہد ءَ یک مرد ءَ وتکشی ءِ جہد کتگ اَت آئیءَ وتارا بن دئیگ ءِ جہد کتگ اَت بلئے آ رکینگ بوتگ اَت چریشیءَ رند وہدے آئی ءَ اے جار جت گڈاں ہما درائیں ملک چشکہ پاکستان اوں کہ ٹرمپ ءِ حامی بوتگ ءُُ ہمے گمانے بوتگ اَت آ پریشاں کارے کت بہ کنت نوں آہانی دیم ءَ اے پدر بوتگ اَت کہ اے صدر پہ کس ءَ ہچی نہ کنت بلکیں اے وت سیاسی مردمے نہ بوتگ بلکیں یک سرمایہ کارے بوتگ پمشکا سیاسی چست ءُُ ایراں چہ نابلد اِنت ءُُ چشیں کار کتگے ءُُ آوکیں وہداں آ چشیں گامگیج زرت کنت پمشکا کس وتی دل ءَ وش ءُُ ایمن مہ کنت ۔
چشیں پابندی ءُُ جارچینی ءَ امریکی بنشون ءِ رد ءَ پہ ناشرکاری ءِ گرو دار ءَ جنگ بوتگ اَنت بلئے دنیا ءِ درائیں ملک سرپد اِنت کہ ناشرکار ءِ اسل ودی کنوک کئے اِنت پمشکا ایشیءِ پشدر اے نہ اِنت بلکیں ’’اے دگہ دیگے گرْادگ ءَ اَنت‘‘ ۔آوکیں وہد وتی ایشیءِ پدرائی ءَ کنت کہ اے اوشت ءُُ پابندی ءِ اسل مول ءُُ مراد چے بوتگ؟ پرچکہ ناشرکاری پہ چشیں اوشت ءُُ پابندی ءَ کہ ہلاس بوتیں داں دیری ہلاس بوتگ اَت ۔اے ڈول ءَ درائیں ملک وتی وتی دوست ءُُ نادوستیں ملک ءِ مردمانی سرا اوشت ءُُ پابندی بہ جنت ءُُ ہمے بگوش اَنت کہ ناشرکاری ءِ دارگ ءَ اے اوشت جنگ بوتگ۔
