بلوچانی زہرشانی ءَ ابید ہم حکومت ءُُ شماریات ءِ بہر گ مردم شماری ءِ بابت ءَ بلوچ راج ءِ ترس ءُُ بیماں ہچ وڑا مان نیار گان انت ۔چاگردی رسانک در ءَ بلوچانی ( ملک ءُُ درملک ءَ ) زہرشانی ءُُ تکانسر ی جوانی ءَ گندگ بوہگان انت بلئے ہنچو کہ پیسر ءَ نبشتہ کنگ بوتگ کہ اے بابت ءَ بلوچ پارلیمانی پارٹیانی لیکہ ءُُ اوشتانک (stance) سک نزور انت ۔اے درگت ءَ اے سکیں بژنی گپے کہ اے سنگینیں جیڑہ یے بابت ءَ ہم بلوچ پارلیمانی پارٹی چو ووٹ ءُُ گچین کاری اوشتانکے ءِ وڑا کار کنگان انت۔ چریشی ءَ پدر بیت کہ اے پارٹیاں گوں بلوچ آکبت ءُُ آئی ءِ پجار ءَ گوں ہچ وڑیں مہر ءُُ واہگے نیست ۔ اے پارٹی ایوک ءَ اے جیڑہ ءَ وتی ووٹ ءُُ گچین کاریاں حاترا کارمرز کنگ لوٹ انت حالانکہ مردم شماری ءِ جیڑہ بلوچ ءِ آکبت ءِ جیڑہ اِنت۔ وہدیکہ بلوچ پارٹیانی سُر ءُُ پُراں ہمنچو گمان بیت کہ اے پارٹیاں ۱۵ مارچ ءَ مردم شماری ءَ بائیکاٹ نہ کنگ ءِ سوڈگ کتگ بلئے چوکہ اے پارٹی زان انت کہ آہانی کاردار ( ورکر) چو ہالو ہالورازی نہ بنت پمشکہ اے پارٹی وتی اے کاردارں کم کم ءُُ میزان میزان ءَ رازی ءُُ سرپد کنگ ءِ جہد ءَ انت کہ مردم شماری بلوچستان ءِ حق ءَ گہتر ءُُ جوان انت ۔ تنکہ کاردار سرپد بہ بنت کہ اے پارٹی لیڈراں ہنچو پہ دیم مردم شماری ءِ پلہ مرزی نہ کتگ بلکیں سے ءُُ چار ماہ ءَ چار ءُُ بچار ءُُ شہ زانتیں بلوچ مردماں سلاہ ءُُ شور ءَ پد اے سوڈگ کتگ کہ مردم شماری ءَ بہر زورگ بہ بیت دومی دست ءَ اے پارٹیانی مجبوری انت پرچکہ اگاں اے مردم شماری ءَ بائیکاٹ بکن انت گڈا ملک ءِ مزن سندیں واکدار آؤکیں گچین کاریاں اے لیڈراں پہ وتی ایم پی اے ، ایم این اے، سینٹر ، وزیراعلیٰ ءُُ اسپیکر ی( گورنری چوناہا ایشانی نہ اِنت) ءِ لڑ ءَ درکن انت کہ اشاں ہچ وڑا منظور نہ انت ۔پرچکہ ماہیگ بلکیں بے آپ ءَ بوت بکنت بلئے مئے پارلیمانی لیڈر بے پارلمنٹ ءَ ہچ وڑا بو ت نہ کن انت ۔پرچکہ’’ اشتر ءَ یکبرے گز ءَ بینگ وارتگ ‘‘۔ پمشکہ بے دپ جنگ ءَ بوت نہ کنت ۔البت اے پارٹی وتی کارندہاں رپینگ ءِ حاترا دو ءُُ سے ماہ ءَ جوان کار کن انت ءُُ روتاکاں تران کاری ہم کن انت ءُُ گڈ سرا وتی مردم شماری ءَ ہور بوہگ ءِ سوڈگ ءَ کن انت ۔دومی نیمگ ءَ مزن سندیں واکداراں اے وہداں ،’’افغان مہاجر‘‘ پمشکہ مہتل داشتگ انت تنکہ بلوچستانءَ اے وتی بندری ءُُ بنکی مول ءُُ مراداں دست ءَ بیار انت۔پرچکہ افغانستان ءَ گوں وتی سیاد یاں حرابی ءَ پد اے چد ءُُ دیم ہچ وڑا ’’ افغان مہاجریناں ‘‘ پاکستان ءَ نادینگ ءِ حق ءَ نہ انت تنکہ اے پہ افغانستان سردردے بہ بنت ۔بلئے چریشی ءَ پیش آ اے مہاجرانی ءَ پشت ءَ بلوچستان ءَ آبادی سند ءُُ بدل کنگ لوٹ انت ۔مزن سندیں واکدار یک تیرے ءَ دو شکار کنگ لوٹ انت ۔یکے بلوچستان ءَ آبادی سند ءَ بدل کنگ ءُُ دومی پہ مدامی افغان مہاجرانی چہ ملک ساد ءِ سندگ۔ اے وڑا پاکستان ءَ پہ دائمی مہاجرانی جیڑہ ہلاس بیت ۔دومی دنیا ءَ اے ثابت بیت کہ بلوچستان ایوک ءَ بلوچانی نہ انت بلکیں ادا اوگان راج گیشتریں بہرے جاہ منند انت۔ پدا پرے کار ءَ بلوچ پارلیمانی لیڈرانی یک برے پدا وریز اعلیٰ بوہگ ءِ سوبمندی ءَ بلوچ ءِ آبادی کم بوہگ پراں گرانیں سوادیے نہ اِنت بلئے بلوچ پارلیمانی رہشون بزان انت کہ یکبرے اگاں بلوچ آبادی کم پیشدارگ بوت گڈا پدا اے رہشون ہم وزیر اعلیٰ ءُُ اسپیکری ءَ دل ءَ بشود انت۔
