کوئٹہ:  صوبائی دارالحکومت کوئٹہ سمیت اندرون بلوچستان مختلف حادثات و واقعات میں 2 بھائیوں سمیت 5 افراد جاں بحق جبکہ 4 افراد زخمی ہوگئے۔

تفصیلات کے مطابق گزشتہ روز کوئٹہ کے نواحی علاقے سریاب میں کوئٹہ سے کراچی جانے والی بولان میل ایکسپریس کی ٹکر سے ایک نامعلوم شخص جاں بحق ہوگیا جس کی لاش سول ہسپتال منتقل کی گئی جہاں پر لاش کو ضروری کارروائی کے بعد شناخت کے لئے مردہ خانہ میں رکھ دیا گیا ۔

اسی طرح مستونگ کے علاقے کھڈکوچہ میں تیز رفتار گاڑی الٹنے کے نتیجے میں 2 سگے بھائی لیاقت علی ، ذیشان سکنہ سیٹلائٹ ٹاؤن موقع پر جاں بحق جبکہ احمد شدید زخمی ہوگیا ۔

اسی طرح حب کے علاقے میں تیز رفتار بس سوراب ندی میں گرنے سے پانی میں ڈوب کر محمد ریاض نامی شخص جاں بحق ہوگیا جس کی لاش نکال لی گئی ۔

اس کے علاوہ وندر کے علاقے میں تیز رفتار دو گاڑیوں میں تصادم کے نتیجے میں ایک شخص سید احمد موقع پر جاں بحق جبکہ عبدالشکور ، اویس اور علی شدید زخمی ہوگئے لاشوں اور زخمیوں کو ہسپتال منتقل کر دیاگیا لاشیں ضروری کارروائی کے بعد ورثاء کے حوالے کردی گئیں ضروری کارروائی مقامی انتظامیہ کررہی ہے ۔