کوئٹہ:معروف معالج ڈاکٹر امیر محمد جوگیزئی نے کہا ہے کہ میرے خلاف نیب کیس میں ملوث ہونے کے پروپیگنڈے میں کوئی صداقت نہیں ہے نیب میرے پاس موجود دستاویزات دیکھے اگر میں مجرم ہوں تو سزا کی معافی کی درخواست نہیں کرونگا،یہ میری ذات کا نہیں بلوچستان کا مسئلہ ہے اچھے لوگوں کے چہروں کو مسخ کیاجارہاہے ۔

وزیراعظم عمران خان نے اگر تھوڑی دیر کیلئے ہی گورنر نامزد کیا اس پر میں ان کا مشکورہوں کہ انہوں نے مجھ پر اعتماد کیا، انہوں نے یہ بات جمعہ کو کوئٹہ پریس کلب میں صحافیوں سے بات چیت کرتے ہوئے کہی۔

انہوں نے کہا کہ میں نے وزیراعظم عمران خان سے ملاقات کی تھی اورانہوں نے خوشی کا اظہارکیاتھا کہ ڈاکٹر صاحب ہمیں بلوچستان سے آپ جیسے لوگ چاہئیں جو ہمارے ساتھ چلیں، انہوں نے مجھ پر اعتماد کا اظہار کیا اور تھوڑی دیر کیلئے ہی گورنر بلوچستان نامزد کردیا اس دوران بعض لوگوں کی طرف سے پروپیگنڈہ کیاگیا کہ میں نیب کے کیس میں ملوث ہوں جودرست نہیں ہے۔

انہوں نے کہاکہ کڈنی سینٹر جو بہت بری حالت میں تھا2006ء میں اس وقت کی انتظامیہ سے2036 تک معاہدے کے تحت لیاتھا اس کو چلایا اور اچھی حالت میں پاؤں پر کھڑا کردیا لیکن درمیان میں معاہدہ توڑدیاگیا، جہاں تک سامان کی خریدوفروخت کی بات ہے تو2005ء میں ورکرز ویلفیئر بورڈ کے ذریعے ایک پرپیومنٹ کمیٹی بنائی گئی جولائی اور اگست میں خرید وفروخت ہوئی ۔

ہمیں نومبر میں سامان ملا2015ء میں نیب نے مجھے گواہ کے طور پر بلایا میں نے اس وقت کے وزیراعلیٰ معائنہ ٹیم کے خواجہ صدیق اکبر نے پرپیومنٹ کمیٹی بنائی تھی میں اب بھی گواہی کیلئے تیارہوں انہوں نے کہا کہ یہ عمران خان کی بھی بدقسمتی ہے کہ ہیلی کاپٹر سمیت ان کی چھوٹی چھوٹی باتوں کو اچھالاجارہاہے مجھے اپنے خاندان کی عزت بھی عزیز ہے میری کسی جماعت سے سیاسی وابستگی نہیں بلکہ میرے خاندان کا سیاسی پس منظر سب کے سامنے عیاں ہے ۔

میرے والد مغربی پاکستان اسمبلی کے رکن اور قائداعظم کے قریبی دوستوں میں سے تھے میرے والد نے بلوچستان سے برٹش کا جھنڈا اتار کر پاکستان کا جھنڈا لہرایا میرے بڑے بھائی وفاقی وزیر، سفیر اور گورنر بلوچستان رہ چکے ہیں ۔

یہاں میں بات اپنے خاندان کی نہیں بلکہ بلوچستان کی کرتاہوں یہاں کے اچھے لوگوں کا چہرہ کیوں مسخ کیاجاتاہے میرے پاس دستاویزات ہیں نیب دستاویزات دیکھے اور اس حوالے سے میں گواہی کیلئے بھی تیارہوں۔