سکھر: سکھر آئی بی اے یونیورسٹی اور ریکو ڈک مائننگ کمپنی کے درمیان ریکو ڈک اسکالرشپ پروگرام 2025 کے باقاعدہ آغاز کے لیے مفاہمتی یادداشت (ایم او یو) پر دستخط کیے گئے۔ یہ ایک اہم اقدام ہے جس کا مقصد ضلع چاغی، بلوچستان کے باصلاحیت نوجوانوں کو معیاری اعلیٰ تعلیم تک رسائی فراہم کرنا ہے۔

اس موقع پر بریفنگ دیتے ہوئے وائس چانسلر سکھر آئی بی اے یونیورسٹی، پروفیسر ڈاکٹر آصف احمد شیخ نے یونیورسٹی کی تاریخ اور ترقی پر روشنی ڈالی، جس میں اس کے قیام اور بانی وائس چانسلر مرحوم پروفیسر نثار احمد صدیقی کے کلیدی کردار کا ذکر کیا۔ انہوں نے یونیورسٹی کے تعلیمی پروگرامز، سہولیات، ایکریڈیٹیشنز اور قومی و بین الاقوامی مقام کا جامع جائزہ پیش کیا۔

انہوں نے وفد کو حکومتِ سندھ کے ساتھ اشتراک میں جاری حالیہ اقدامات اور کمیونٹی سروس میں یونیورسٹی کے کردار سے بھی آگاہ کیا۔ ریکو ڈک اسکالرشپ پروگرام پر گفتگو کرتے ہوئے انہوں نے بلوچستان کے مستحق طلبہ کے لیے معیاری تعلیم کے فروغ کے اس اقدام کو سراہا اور کہا کہ ایسے اقدامات مساوی تعلیمی مواقع کو یقینی بنانے اور طلبہ کو قومی سطح پر مسابقت کے قابل بنانے کے لیے ناگزیر ہیں۔ انہوں نے مزید کہا کہ یونیورسٹی طلبہ کی تعلیمی بنیادوں کو مضبوط بنانے اور ان کے معیار کو بہتر بنانے کے لیے اضافی اقدامات بھی کر رہی ہے تاکہ وہ ملک کی کسی بھی جامعہ میں کسی بھی شعبے میں اعتماد کے ساتھ تعلیم حاصل کر سکیں۔ ریکو ڈک مائننگ کمپنی کے جنرل منیجر ریان مچل نے اپنے خطاب میں کہا: “سکھر آئی بی اے یونیورسٹی کے ساتھ شراکت داری ہمارے لیے انتہائی اہمیت کی حامل ہے۔

سکھر آئی بی اے ایک ممتاز ادارہ ہے جو تعلیمی معیار اور قیادت کی تربیت کے حوالے سے مضبوط شہرت رکھتا ہے۔ باہمی تعاون کے ذریعے ہم چاغی کے مقامی ٹیلنٹ کی ترقی میں ایک نئی جہت شامل کر رہے ہیں اور اس بات کو یقینی بنا رہے ہیں کہ طلبہ کو معیاری تعلیم میسر ہو جو انہیں عملی زندگی کے چیلنجز کے لیے تیار کرے۔

” ریکو ڈک اسکالرشپ پروگرام 2025 کا مقصد اعلیٰ تعلیم تک رسائی کو فروغ دینا، شمولیت کو یقینی بنانا خصوصاً طالبات کی شرکت کی حوصلہ افزائی کرنا، اور نوجوانوں کے لیے طویل المدتی تعلیمی مواقع فراہم کرنا ہے۔

نومبر 2025 میں ضلع چاغی میں آؤٹ ریچ سرگرمیوں اور دسمبر 2025 میں نوکنڈی اور دالبندین میں داخلہ ٹیسٹس کے انعقاد کے بعد 52 منتخب طلبہ کو سکھر آئی بی اے یونیورسٹی میں چھ ماہ کے فاؤنڈیشن پروگرام میں داخل کیا گیا ہے، جس کے بعد تقریباً 25 طلبہ کو ملک کی معروف جامعات میں مکمل فنڈڈ انڈرگریجویٹ اسکالرشپس دی جائیں گی۔

ایم او یو پر دستخط سکھر آئی بی اے یونیورسٹی اور ریکو ڈک مائننگ کمپنی کے درمیان ایک مضبوط شراکت داری کی عکاسی کرتے ہیں، جس کا مقصد تعلیمی شمولیت کو فروغ دینا اور دور دراز و پسماندہ علاقوں کے طلبہ کے لیے مواقع کو وسعت دینا ہے۔

یہ اقدام بلوچستان میں انسانی وسائل کی ترقی کے لیے ایک اسٹریٹجک سرمایہ کاری کی حیثیت رکھتا ہے، جو تعلیمی خلا کو کم کرنے، مالی رکاوٹوں کے بغیر اعلیٰ تعلیم تک رسائی، خواتین کی شرکت کے فروغ اور مستقبل کے رہنماؤں کی تربیت کے ذریعے ایک زیادہ باخبر اور جامع پاکستان کی تشکیل میں معاون ثابت ہوگا۔ تقریب کے اختتام پر سووینئرز تقسیم کیے گئے، جس کے بعد گروپ فوٹو لیا گیا اور اس طرح یہ تقریب خوشگوار انداز میں اختتام پذیر ہوئی۔