جاتی امرا میں ہونے والی انتہائی اہم ملاقات کے بعد نریندرمودی جب بھارت واپسی کے لیے ایئرپورٹ روانہ ہونے لگے تو وزیراعظم نوازشریف بھی ایئرپورٹ روانگی کے لیے اپنے بھارتی ہم منصب کے ہمراہ ایک ہی گاڑی میں روانہ ہوئے جس کے بعد نریندرمودی کو ہیلی کاپٹر کے ذریعے ایئرپورٹ پہنچایا گیا جہاں وزیراعظم نوازشریف نے انہیں الوداع کہا۔ ذرائع کا کہنا ہے کہ بھارتی وزیراعظم کے ہمراہ ان کے وزیردفاع، سیکرٹریز اورتاجر و صنعتکار موجود تھے جب کہ پاکستانی وزیراعظم کے ہمراہ وفاقی وزیرخزانہ اسحاق ڈار، وزیردفاع خواجہ آصف، وزیراعلیٰ پنجاب شہبازشریف اور دیگروفد میں شریک تھے۔ وزیرخزانہ اسحاق ڈارنے بھارتی وزیراعظم کی آمد کے حوالے سے کیے گئے تمام انتظامات کا خود جائزہ لیا جب کہ اس موقع پر لاہورایئرپورٹ پرفلائٹ آپریشن بھی روک دیا گیا۔ دوسری جانب بھارتی وزیراعظم کے لاہور پہنچنے پر بھارت میں اپوزیشن جماعت کانگریس اور عام آدمی پارٹی کی جانب سے شدید رد عمل دیکھنے میں آرہا ہے جب کہ دارالحکومت دہلی میں کارکنان کی بڑی تعداد سڑکوں پر جمع ہوئی اور حکومت مخالف نعرے بازی کرتے ہوئے بی جے پی کے جھنڈے نذرآتش کردیئے۔ واضح رہے کہ رواں ماہ کے آغاز میں پاکستان میں ہونے والی ہارٹ آف ایشیا کانفرنس میں بھارتی وزیرخارجہ سشما سوراج کا کہنا تھا کہ امن اور دوستی کا پیغام لے کر پاکستان آئی ہوں اور وزیراعظم نریندر مودی بھی جلد پاکستان کا دورہ کریں گے۔قبل ازیں نریندر مودی کا مائیکرو بلاگنگ ویب سائٹ ٹویٹر پر اپنے پیغام میں کہنا تھا کہ افغانستان سے نئی دہلی واپسی پرتھوڑی دیرلاہورایئرپورٹ پرقیام کروں گا جہاں پاکستانی ہم منصب نوازشریف سے ملاقات ہوگی۔