Posts By: شونگال

اے ماہ ءِ بندا تءَ اتکگیں ہور ءُُ ہرّگاں کیچ ءِ مہلوک ءَ مزنیں تاوانے داتگ ات بلئے لہتیں روچ بیت کیچ جہگیرانی نیمگ ءَ اے جار جنگ بوتگ کہ آ چہ مہلوک ءَ بے ترانگ ءُُ بے حال نہ اَنت۔

دین ءُُ مذہب ءِ کار مردمانی مادنیں راہ ءِ شون دئیگ ءُُ مردماناں نیکیں پنت کنگ اِنت ۔بلئے چندے ناشریں مردماں نیکراہ ءُُ مذہب ءَ را سک بدنام کتگ ۔مرچی اگاں مردمے وتی نام ءَ مسلمان بہ کنت داں درقومی مردمے چرے گپ ءَ ترس ءُُ بیم ءِ تہا کیت کہ باریں چونیں مردمے بہ بیت ۔

مکران ءَ 12 سال ءَ قحط ءُُ ڈکال ءَ پد یک جوانیں ہور ءُُ بارانے اتک کہ آئی ءَ مکران ءِ سوتکگیں ڈن ءُُ پٹ ، ڈگار ءُُ بست ،بل ءُُ کمبیل آپدار کت انت۔ بلئے ابرمی ہچ شے بنی آدم ءِ دست رس ءَ نہ انت پمشکہ دورسریں کوران آپ کت ءُُ بازیں بازار ءُُ بندے بُرت۔

بلوچستان ءِ بنجاہی شہر بزاں کوئٹہ ءِ اے دگہ جیڑگاں بل کہ آوانی گیشواری ءَ باریں دگہ چنت سال ءُُ دگہ چنت رہشون ءِ پکاری بیت ۔بلئے یک دگہ مستریں جیڑگے کہ ہورءُُ بارانی موسماں لس مہلوک ءَ دیم ءَ کیت انت آ روڑءُُ دگّانی سرءِ گٹری آپانی اِنت ۔

۱۹۵۰ ءَ وہدے نوکر شاہی ءَ خواجہ نظام الدین ءِ حکومت ھلاس کت ہما روچ ءَ پد نوکرشاہی ءُُ آئیءِ کاردار دمگی جیڑگانی حلاپ ءَ کار بندات کت ۔اولی روچ ءَ ایشانی کوشش ہمے بوتگ کہ پاکستان ءَ یک طرزی حکومت بہ مانیت ءُُ وفاق بنگوج کنگ بہ بیت۔

کوئٹہ شہر بلوچستان ءِ بنجاہی شہر اِنت پمشکا درائیں مہلوک ءِ چم ہمیشی ءَ سک اِنت چیزے پہ کارو روزگار ہمے شہر کیت ءُُ چیزے پہ وانگ ءُُ زانگ ءَ ، چیزے وتی علاج ءَ کیت ءُُ چیزے پہ سئیل ءُُ سواد۔ اے شہر ءَ بلوچستان ءِ درائیں مزن مزنیں دفتر اوں است انت پمشکا ہرحساب ءَ مہلوک ءِ وابستگیں گوں اے شہر ءَ انت ،بلئے شہر ءِ ہما کہ مئیر اِنت یاکہ شہر کارمستر انت آئی ءَ وتی ذمہ واری پیلو نہ کتگ اَنت ۔

بلوچستان ءِ بازیں جیڑہ است انت کہ پریشاں حکومت ءَ ہچ رنگیں گامگیج نہ زرت ءُُ نیکہ آئی ءِ زورگ ءِ وڑ ءُُ پیم است انت ۔ہمے جیڑہاں چہ یکے گیس اِنت ۔ بلوچستان ءَ چہ حدائی نعمتاں چہ یک ہمے گیس اِنت کہ چہ بلوچستان ءَ درکپگ اَنت ۔

بلوچستانءِ اے دگہ جیڑگانی ہواری ءَ یک مستریں جیڑہ یے لس مہلوک ءِ حیالداری اِنت کہ حکومتی کارندہ اے کار ءَ چہ پہک بے حال ءُُ شموشکار اَنت۔لس مہلوک ءِ کسان کسانیں جیڑہ اَنت ءُُ ہما جیڑہ کہ حکومت ءِ وس ءُُ واک ءَ در ہم نہ اَنت۔

بیست ءُُ یک جنوری ءَ بیلہ ءِ نزیک ءَ چہ کراچی ءَ آوکیں مساپری کوچے ءَ گوں ٹیلی ٹینکرے ءَ ڈکّر وارتگ ات کہ چہ آئی ءَ ٹیلی ٹینکر ءُُ کوچ یکجاہ سوتکگ ءُُ پر بوتگ ات انت ۔ چرے ویل ءَ 27 مردم بیران بوتگ انت کہ اے درہانی سیادی گوں پنجگور ات۔

اے بتل ءِ معنا کنگ نہ بیت کسے ایشی ءَ سرپد بیت شر نہ بیت شر بلئے زانوک زانت کہ اے گنج کجا اِنت ءُُ مار کئے اِنت۔گوستتگیں بیست سال ءَ گیش اِنت کہ سرکار جارءَ انت کہ’’ گوادر کو میگا سٹی بنائیں گے‘‘گوادر ءِ میگا سٹی ءَ وَ بل آہود ءِ نندوکیں مردماں پہ ورگی آپے اوں انگت ءَ شوہاز گ نہ بوتگ ۔یکبرے گوادر ءَ را سنگاپور ءَ را دئیگ بوتگ اَت ،پدا چین ءَ را ءُُ نوں عرب ملکانی دست ءَ دئیگے لوٹ اَنت ۔