اے وھد ءَ کہ بلوچی لبزانک کہ’’ گیشتر کتاب چاپ بوھگ ءِ نادراہی ءَ گور جتگ‘‘ سنگین ءُُ گرانیں نبشتہ کم گندگ بیت اے چارگ ءِ بدل ءَ کہ چشیں چیزے نبشتہ کنگ بیت کہ وانگ بکرزایت بلوچ نبشتہ کار وتی کتابانی حساب ءَ گیش نہ انت کہ’’ منی کتاب گیشتر انت‘‘ بلے گپ ایش انت کہ نوں بلوچی لبزانک چہ اے سیمسراں گوستگ کہ ’’ کتابے چاپ بوتگ‘‘ نوں گپ ایش انت کہ چونیں کتابے یا چنچو وانگ کرزایت ھمے درچ ءَ ضیا بلوچ یک سنگین ءُُ جوانین نبشتہ کارے ءِ درچ ءَ بلوچی لبزانک ءَ پڑ ءَ بورتاچی ءَ انت ۔آئی دوئیں کتابانی وانگ ءَ سما بیت کہ ضیا بلوچ بلوچی لبزانک ھما نادراھانی رم ءَ نہ انت کہ’’ منی کتاب گیشتر انت آئی ءِ وانگ ءَ پد سما بیت کہ آئی ءَ ھرچی نبشتہ کتگ پہ اے پیشدارگ ءَ ناں مردماں ابکہ ءُُ حیران بکنت بلکین آئی ءِؒ نبشتہ ءِ پشت ءَ آئی ھذمت آئی ءِ سنچ ءُُ بود سما ءُُ سسا ءُُ وانگی مڈی ھوار انت آئی ءِ وانگ ءَ اے سما بیت کہ آ چو مئے ڈپومہ ھولڈریں یا دو کانفرنس ءَ ھوارءَ بووکیں وت گڑیں زبان زانتے نہ انت کہ ۱۵ روچی ڈپلومہ ءُُ دوروچی کانفرنس ءَ ھوار بوھگ ءَ پد چہ مہلوک ءُُ وانوکاں linguist ءِ سندی کاگد (Certificate) ے ءَ دلمانگ انت بلکیں بلوچی توارینک ءِ وانگ ءَ سمان بیت کہ آ نہ تہنا وتی کار ءُُ پد ءَ بلد انت بلکیں پہ اے کار ءَ آئی ءَ بازیں جکانسری یے کش اتگ۔
ماں کتاب ءَ ضیا بلوچ ءَ زبان ءِ توار ءِ کاررہبند ( system) چو سائنسی رد ءَ گوں نکشون (Diagrame) ءَ داتگ انت ءُُ زبان ءِ اے گرانیں کار رھبند ارزانیں وڑے ءَ وانوک ءَ را سر پد کتگ چوکہ ایندگہ بلوچی نبشتہ کاراں ضیا بلوچءَ اے درائیں سیاھگ چہ دگہ زبانے؛ ءَ رجانک نہ کتگ انت بلکیں اے درائیں کار رھبند ءَ سرپد بوتگ ءُُ پدا وانوک ءَ سرپد کنگ ءِ جہد کتگ پمشکا وانوک تچکا اے گشتگیں سیاھگاں جوانی سرپد بیت ءُُ ھچ جاہ ءَ مان نہ گش ایت ۔دومی جوانیں کار کہ بلوچی ءَ اولی وار ءَ گندگ بیت زبان ءِ توار ءِ درائیں گالبند بلوچی ءَ ھنچو ترینگ بوتگ انت کہ درآمدی یے ءِ گمان نہ بیت اول وَ بائدیں لبز’’ ترنیگ ‘‘کارمرز کنگ مہ بیت پرچکہ اے کار رھبند ءِ درائیں آواز وت بلوچی ءَ ھست انت ءُُ ضیا بلوچ ءَ اے ھذمت ءُُ جکانسری ستائے کرزایت کہ آئی ءَ اے چہ بندری بلوچی ءَ شوہاز کتگ ءُُ کتاب ءَ کارمرز کتگ انت ۔
ضیا بلوچی ءِ بدل ءَ اگاں اے کار دگہ ڈپلومہ ھولڈریں زبان زانتے ءَ بکت انت گمان ات آئی ءَ: اے درائیں گالبند وت نشت ٹہینت انت پدا مارا شگانے جت کہ واجہ بلوچی ءَ اے گالبند نیست انت ۔( کئے ءَ گردن برات) بلئے ضیا بلوچ ءَ شاباش انت اے درگت ءَ نہ تہنا جکانسری کتگ بلکیں ھرچ گالبند ھمدپیں بلو چی گالبند شوھاز کتگ کتاب ءِ وانگ ءَ زانگ بیت کہ ضیا بلوچ ھمنچک چہ زبان زانتی ءِ زانت ءُُ زانشت ءَ سہی ءُُ سرپد انت ھمنچک چہ ڈمی ماتی زبان بلوچی بہہ ءُُ بندراں آشنا ءُُ آژناگ انت پرچکہ گوں ما بد بختی اے بوتگ کہ ھما کہ زبان زانت انت یا زبان زانشت ءَ بلد انت آ بلوچی ءَ نزوراتن اگاں بلوچی ءَ پکا انت گڈا زبان زانتی ءِ زانت ءُُ زانشت ءَ نابلد انت ءُُ ناسہی انت بلئے ضیا بلوچ ءِ دروشم ءَ اے وھد ءَ بلوچی زبان ءَ یک جوانین کارندہ ءُُ زانتکارے دست کپتگ بلوچی زبان ءِ ادارگ ءُُ گل بائدیں ضیا بلوچ ءِ اے کتہ کاری ،زانت ءُُ سسا ءَ چہ گیش ءَ گیش نپ ءُُ سیت زورگ ءِ جہد ءَ بکن انت دومی گوں ضیا بلوچ ءَ دزبندی انت کہ وتی اے کار ءَ برجاہ بدارایت پرچکہ آئی ءِ تہا اے سنچ ءُُ بود ءَ سما سک باز انت بائدیں وت ءَ بزانت ءُُ پجہ بیا ر ایت۔
کتاب ءِ نام بلوچی توارینک
نبشتہ کار ضیا بلوچ
تہر زبان زانتی
اولی چاپ فروری ۲۰۱۴
شنگکار رژن ایجوکیشن فاونڈیشن
نہاد ۲۵۰ کلدار
