پاکستان میں کورونا وائرس کے مزید 2 کیسز سامنے آئے ہیں جس کے بعد ملک میں تصدیق شدہ متاثرہ افراد کی تعداد 18 ہوگئی ہے۔محکمہ صحت سندھ کے حکام کے مطابق نئے آنے والے کیسز میں سے ایک کا تعلق حیدرآباد اور ایک کا کراچی سے ہے جبکہ سندھ میں کورونا سے متاثرہ افراد کی تعداد 15 ہوگئی ہے۔کراچی میں کورونا کے تصدیق شدہ مریضوں کی تعداد 14 ہوچکی ہے جن میں سے ایک مریض صحت یاب ہوکر گھر جاچکا ہے۔
افغان صدر بننے کی دوڑ نے صدر اشرف غنی اور چیف ایگزیکٹو عبداللہ عبداللہ میں تنازع پیدا کردیاہے، ملک کا صدر بننے کی ضد میں دونوں رہنماؤں نے علیحدہ علیحدہ حلف اٹھایا۔افغان الیکشن کمیشن نے گزشتہ برس ہونے والے انتخابات میں اشرف غنی کو کامیاب قرار دیا تھا، تاہم ان کے مخالف عبداللہ عبداللہ نے نتائج تسلیم کرنے سے انکار کیا تھا۔اشرف غنی نے صدارتی ہاؤس میں عہدے کا حلف اٹھایا جبکہ عبداللہ عبداللہ نے سپیدار محل میں عہدے کا حلف لیا۔ حلف برداری کی تقریب کے دوران صدارتی محل اور گرد و نواح میں سخت سیکیورٹی انتظامات کیے گئے تھے۔اشرف غنی کی تقریب حلف برداری میں امریکی خصوصی ایلچی زلمے خلیل زاداورنیٹو چیف سمیت دیگر امریکی حکام نے بھی شرکت کی۔تقریب حلف برداری کے بعد اشرف غنی نے کہا کہ جمہوریت کی بحالی کے لیے ہرممکن اقدامات کیے جائیں گے۔
ملک کو چیلنجز اور بحرانات کا ہمیشہ سامنا رہا ہے اور اس میں کوئی شک نہیں کہ موجودہ معاشی بحران اور درپیش چیلنجز کی وجہ بھی سابقہ پالیسیوں کا نتیجہ ہیں۔ مسلسل غلطیوں کے بعد مزید اب ایسی گنجائش نہیں بچتی کہ انہیں دہرایا جائے لیکن بدقسمتی سے ہمارے ہاں مسلسل نہ صرف روایتی پالیسیوں کو جاری رکھا گیا بلکہ بیشتر ادوار میں کابینہ میں وہی وزراء دکھائی دیتے ہیں۔ایک طرف جہاں موروثی سیاست کی بات کی جاتی ہے مگر سدابہار وزراء کی طرف توجہ ہی نہیں دی جاتی کہ وہی چہرے ہرحکومتی ٹیم کا حصہ بن جاتے ہیں جن کا سیاسی جماعت کے حکومتی ایجنڈے سے کوئی تعلق نہیں ہوتا صرف وزارت کیلئے سیاسی وفاداریاں تبدیل کی جاتی ہیں۔اگر اس کلچر کو بڑی سیاسی جماعتیں ختم کریں تو کسی حد تک گورننس میں بہتری آسکتی ہے اور چیلنجز وبحرانات کا صحیح معنوں میں مقابلہ کیا جاسکتا ہے چونکہ ایسی شخصیات سب کچھ اچھا کا راگ الاپتے ہوئے چاپلوسی کو پروان چڑھاتے ہیں اور جب اقتدار کسی دوسری جماعت کے پاس چلی جاتی ہے تو یہ چہرے پارٹی کی روش کا بہانہ بناتے ہوئے غائب ہوجاتے ہیں۔
ملک میں نظام کی بہتری سے ہی کسی بھی چیلنج کا مقابلہ کیا جاسکتا ہے اور اس میں مقامی انتظامیہ کا بڑا عمل دخل ہوتا ہے اس لئے دنیا کے ترقی یافتہ ممالک میں اس کو خاص اہمیت دی جاتی ہے اس کی بنیادی وجہ عوام کو بروقت سہولیات فراہم کرنا اور بحرانات سے نمٹنا ہے۔بدقسمتی سے ہمارے ہاں جب پیٹرولیم مصنوعات کی قیمتوں میں اضافہ ہوجاتا ہے تو اشیاء خوردونوش کی قیمتیں آسمان سے باتیں کرنے لگتی ہیں کیونکہ ایک مخصوص مافیا سرگرم ہوجاتا ہے جس کا مقصد عوام کی چمڑی ادھیڑ کر رکھنا ہوتا ہے حالانکہ جب پیٹرولیم مصنوعات سستی ہوجاتی ہیں تو اشیاء خورد ونوش سمیت کرایوں میں کمی فوری نہیں کی جاتی بلکہ دونوں ہاتھوں سے غریب عوام کو لوٹا جاتا ہے جبکہ مقامی انتظامیہ خواب خرگوش میں مبتلا رہتاہے جس کی ذمہ داری یہی ہے کہ وہ انتظامات پر نظر رکھے اور ہر جگہ اپنی موجودگی کو یقینی بنائے اور گراں فروشوں سمیت ہر قسم کے مافیاز کے خلاف بروقت کارروائی کرے تاکہ عوام کو ریلیف مل سکے۔
ملک میں جب قوانین پر عملدرآمد نہیں ہوتا تو انسانی جان ومال غیر محفوظ ہوکر رہ جاتے ہیں ہمارے یہاں بدقسمتی سے قانون کی دھجیاں بکھیرتے ہوئے چند مافیاز مدرپدر آزادہوکر چند روپوں کے عوض ملکی قوانین کی نہ صرف خلاف ورزی کرتے ہیں بلکہ معاشرے میں کرپشن کوپروان چڑھاتے ہیں۔ ملک میں بلڈنگ کوڈ کی خلاف ورزی مسلسل جاری ہے تو دوسری جانب خستہ عمارتوں میں موجود غریب عوام کو متبادل جگہ فراہم نہ کرنے کی وجہ سے حادثات رونما ہونے کے خدشات بڑھ رہے ہیں۔ گزشتہ روز کراچی میں اس کی ایک جھلک دیکھی گئی، کراچی کے علاقے رضویہ سوسائٹی کے قریب گولیمار نمبر 2 میں تین رہائشی عمارتیں گرنے سے 11 افراد جاں بحق اور18 زخمی ہوگئے۔
بلوچستان کے مسائل کو ایسا محسوس ہوتا ہے کہ صرف نعروں، جلسے جلوس اور اپنے انتخابی مہم کیلئے سیاسی جماعتیں استعمال کرتی ہیں جبکہ حقیقی معنوں میں عوام کی محرومیوں کا احساس کسی کو بھی نہیں صرف بلوچستان کو ایک کارڈ کے طور پر استعمال کیا جاتا ہے وہ بھی اس وقت جب کوئی سیاسی جماعت اپوزیشن میں ہوتی ہے تو اسے بلوچستان ہر جگہ یادآتا ہے اورپھر بلوچستان کی پسماندگی اور محرومیوں کا ایسا رونا رویا جاتا ہے کہ جیسے انہیں بلوچستان کادرد سونے نہیں دیتا۔
اس خطے میں افغانستان نے سب سے زیادہ تباہی دیکھی ہے سرد جنگ سے لیکر نائن الیون کے واقعہ کے بعد تک افغانستان جنگ کی لپیٹ میں رہا،اگر اکیسویں صدی میں کسی ملک نے انسانی بحرانات دیکھے ہیں تو وہ افغانستان ہے جہاں پر عالمی پراکسی نے ایسے پنجہ گاڑھے کہ افغانستان نے سالہا سال تک امن نہیں دیکھا،البتہ سوویت یونین کی واپسی کے بعد یہ گمان کیاجارہا تھا کہ شاید ایک نئی حکومت کی تشکیل اور عالمی طاقتوں کے درمیان موجود چپقلش میز پر ختم ہوجائے گی مگر یہ سلسلہ تھم نہ سکا، طالبان نے جب افغانستان میں انتظامی امور اور حکومت کی بھاگ دوڑ سنبھالی تو اس دوران نائن الیون کا سانحہ پیش آیا جس کے بعد امریکہ اور نیٹونے ملکر افغانستان پر حملہ کردیا اور یہ جنگ 19 سال تک لڑی گئی۔
وزیر اعظم عمران خان کا احساس اسکالر شپ پروگرام ایک بہترین قدم ہے کیونکہ ملک کی ترقی میں نوجوانوں کا کردار انتہائی کلیدی ہے جس سے انکار نہیں کیا جاسکتا جبکہ ہماری نصف آبادی سے زیادہ نوجوانوں پر مشتمل ہے جن پر سرمایہ کاری کرتے ہوئے مختلف پروگرامز مستقل بنیادوں پر ترتیب دینے کی ضرورت ہے تاکہ نوجوانوں کو قومی اداروں اور نظام میں بہتری لانے سمیت دور جدید کے تقاضوں کے مطابق جدیدتعلیم سے بھی آراستہ کیاجائے جس کا عزم پہلے ہی پی ٹی آئی کی قیادت کرتی آئی ہے اور اب حکومت میں رہتے ہوئے اسی تسلسل کو جاری رکھتے ہوئے وزیراعظم عمران خان کی ذاتی دلچسپی اور کاوشیں قابل تعریف ہیں جبکہ پی ٹی آئی کی کامیابی میں نوجوانوں کے کردار سے انکار نہیں کیا جاسکتا کہ جس طرح ان کی جماعت اور حکومت میں نوجوانوں کو مرکزیت دی گئی جو کہ روایتی اور موروثی سیاست کے حوالے سے بھی بڑا قدم ہے۔
دنیا بھر میں اب تک کورونا وائرس سے ہونے والی ہلاکتوں کے باعث لوگ خوف کا شکار ہیں مگر یہ بھی حقیقت ہے کہ اب تک اس وائرس سے متاثر ہونے والے مریضوں میں سے تقریباً نصف صحت یاب ہوچکے ہیں۔کورونا وائرس کے مجموعی طور پر 85 ہزار 683 کیسز رپورٹ ہوئے جن میں سے 46 فیصد سے زائد یعنی 39 ہزار 674 افراد صحت یاب ہو کر اسپتالوں سے جا چکے ہیں جبکہ باقی 43 ہزار مریضوں میں سے 82 فیصد یعنی 35 ہزار 258 کی حالت خطرے سے باہر ہے۔اس وقت دنیا بھر میں کورونا وائرس کے 7 ہزار 818 مریضوں کی حالت خطرے میں ہے۔کورونا وائرس کے سب سے زیادہ کیسز چین میں سامنے آئے ہیں جن کی تعداد 79 ہزار 257 ہے جبکہ دوسرے نمبر جنوبی کوریا میں 3 ہزار 150 اور اٹلی میں 889کیسز رپورٹ ہوئے ہیں۔
بھارتی دارالحکومت نئی دہلی کے شمال مشرقی علاقوں میں انتہا ء پسند ہندو بلوائیوں کے حملوں میں جاں بحق افراد کی تعداد 42 ہوگئی۔دہلی کے شمال مشرقی علاقوں میں 24 فروری کو ہندو انتہا پسندوں نے امریکی صدر ڈونلڈ ٹرمپ کے دورے کے موقع پرمتنازع شہریت کے قانون کے خلاف احتجاج کرنے والے افراد پر منظم حملے کیے تھے۔ہندو انتہا پسندوں کی جانب سے یہ حملے تین روز تک جاری رہے جن میں مساجد، گاڑیوں، مکانات اور دیگر املاک کو نذر آتش کیا گیا۔بھارتی میڈیا کے مطابق دہلی کے شمالی علاقوں میں مسلح جتھوں نے مسلمان نوجوانوں کو شناخت کرکے تشدد کا نشانہ بنایا جس کے نتیجے میں اب تک ہلاکتوں کی تعداد 42 تک جاپہنچی ہے۔