دبئی: ٹی 20 کا نیا چیمپئن کون ہو گا اس کا فیصلہ آج ہو گا۔ انٹرنیشنل کرکٹ کونسل (آئی سی سی) ٹی ٹوئنٹی ورلڈکپ کا فائنل آج کھیلا جائے گا۔فائنل میں نیوزی لینڈ اور آسٹریلیا آمنے سامنے ہوں گے۔ میچ پاکستانی وقت کے مطابق شام 7 بجے شروع ہو گا۔

آسٹریلیا پاکستان کو اور نیوزی لینڈ انگلینڈ کو ہرا کر فائنل میں پہنچا ہے۔ دونوں ٹیمیں پہلی مرتبہ ٹی ٹوئنٹی ورلڈ کپ کے فاتح کا تاج سر پر سجانے کے لیے میدان میں اتریں گی۔

سیمی فائنل میں نیوزی لینڈ نے پوائنٹس ٹیبل پر ٹاپ کرنے والی انگلش ٹیم جب کہ آسٹریلیا نے ناقابلِ شکست پاکستانی ٹیم کوہرایا ہے۔

فائنل سے قبل نیوزی لینڈ کی ٹیم کو اس وقت بڑا دھچکا لگا جب ان کے ان فارم وکٹ کیپر بیٹر ڈیون کونوے زخمی ہونے کی وجہ سے فائنل سے باہر ہو گئے ہیں۔

دونوں ٹیموں کے درمیان اب تک 138 ون ڈے میچز کھیلے گئے جس میں آسٹریلیا نے 92، نیوزی لینڈ نے 39 جیتے اور 7 میچ بے نتیجہ رہے۔