حکومت مخالف اپوزیشن اتحاد پاکستان ڈیمو کریٹک موومنٹ کی اسٹیئرنگ کمیٹی نے حکومت کے خلاف غیر معینہ مدت تک دھرنے کی منظوری دے دی ،یہ فیصلہ پی ڈی ایم کی اسٹیئرنگ کمیٹی کے اجلاس میں ہوا۔ دھرنے کو لانگ مارچ کا نام دینے کا فیصلہ کیا گیا جبکہ ملک بھر سے قافلے ایک ساتھ اسلام آباد میں داخل ہونگے۔ لانگ مارچ میں شامل ہر جماعت اپنے کارکنوں کا خرچ اٹھائے گی، اجلاس میں فیصلہ ہوا کہ دھرنے کی جگہ باتھ روم، کھانے اور دیگر انتظامات تمام جماعتوں کی مقامی تنظیمیں اٹھائیں گی جبکہ راولپنڈی ،اسلام آباد، کے پی کے، آزاد کشمیر اور نواحی علاقوں کے کارکنوں کو زیادہ تعداد میں لانے کا فیصلہ کیا گیا ۔

ملک میں کسی بھی حکومت نے معیشت کومستحکم کرنے کیلئے قرض لینے کاجواز پیش نہیں کیا بلکہ یہی بات دہرائی گئی کہ معیشت کو سہارا دینے کیلئے قرض لینا مجبوری ہے چونکہ ماضی کی حکومتوں نے اتنے قرض لئے ہیں کہ ان کی ادائیگی کیلئے معاشی پہیہ کو چلاکر ہی ان سے نکلاجاسکتا ہے مگر اس بات کو تسلیم نہیں کیا گیا کہ جتنے قرضے لئے جائینگے اتنا ہی سود کی مد میں قومی خزانے پر بوجھ بڑھتاجائے گا۔ قرض لے کر معیشت کو چلاکر پھر اسی آمدن کی ایک خطیر رقم سود سمیت قرض کی مد میں دینی پڑتی ہے اور اس کا براہ راست اثر عوام مہنگائی کی صورت میں برداشت کرتے ہیں۔

جمہوری نظام کی مضبوطی کابنیادی جز پارلیمان ہے جہاں پر آئین وقانون کی بالادستی کو برقرار رکھنے کیلئے ملک اورعوامی مفاد میں قانون سازی کی جاتی ہے اور فیصلہ سازی کے عمل کے دوران ہر اس عمل کی باریک بینی سے جائزہ لیاجاتا ہے کہ مستقبل میں اس کے جمہوریت اور مقدس ایوان کے ذریعے قومی مفادات کا تحفظ کس طرح کیاجاسکتا ہے مگر بدقسمتی سے سینیٹ انتخابات کی آمد کے ساتھ ہی یہ بات زدعام ہوجاتی ہے کہ سینیٹ انتخابات میں بولی کتنی لگ رہی ہے جوکہ انتہائی شرمناک عمل ہے اورجمہوری نظامکے منہ پر طمانچہ ہے کہ جو ایوان بالا میں نمائندگان لائے جارہے ہیں۔

وفاقی وزیر برائے سائنس و ٹیکنالوجی فواد چودھری نے دعویٰ کیا ہے کہ مریم نواز لندن جانا چاہتی ہیں۔ انہوں نے کہا کہ اس مقصد کے لیے بیک ڈور رابطے کیے گئے ہیں۔وفاقی وزیر فواد چودھری نے سماجی رابطوں کی ویب سائٹ ’ٹوئٹر‘ پر جاری کردہ بیان میں کہا کہ وزیراعظم عمران خان نے اس ضمن میں ملنے والی درخواست کو مکمل طور پر رد کردیا ہے۔وفاقی وزیر فواد چودھری نے نام لیے بغیر کہا کہ آپ تحریک کا شوق پورا کرلیں لیکن اس کے لیے آپ کو پاکستان میں رہنا ہو گا۔

وزیر اعظم عمران خان نے عوام کو ریلیف دینے کے لئے اوگرا کی جانب سے پٹرولیم مصنوعات میں مجوزہ اضافے کی تجویز مسترد کر دی۔اوگرا کی جانب سے پٹرول کی قیمت میں 14.07 روپے، ہائی سپیڈ ڈیزل کی قیمت میں 13.61 روپے، کیروسین (مٹی کے تیل) کی قیمت میں 10.79 روپے اور لائٹ ڈیزل کی قیمت میں 7.43 روپے اضافہ تجویز کیا گیا تھا۔وزیر اعظم نے عوامی فلاح و بہبود کو مد نظر رکھتے ہوئے پٹرولیم مصنوعات میں اضافے کی تجویز منظور نہیں کی۔وزیراعظم نے کہا کہ حکومت عوام کو ریلیف کی فراہمی کے لئے ہر حد تک جائے گی۔

افغانستان میں دہشت گردی کے واقعات تھمنے کا نام نہیں لے رہے، آئے روز بم دھماکے اور خود کش حملے رپورٹ ہورہے ہیں جس پر پاکستان سمیت دنیا کے بیشتر ممالک نے تشویش کااظہار کرتے ہوئے کہا ہے کہ حالیہ دہشت گردی کے واقعات سے امن عمل کو نقصان پہنچے گااور پورے خطے میں بدامنی کے خطرات بڑھ سکتے ہیں اس لئے ان واقعات کو روکنے کی اشد ضرورت ہے، حالانکہ افغانستان میں امن کے قیام کے حوالے سے امریکہ اور افغان حکومت کے طالبان کے ساتھ معاہدے بھی ہوچکے ہیں مگر اس کے باوجود بھی دونوں اطراف سے طاقت کے استعمال میں کوئی خاص کمی نہیں آئی ہے۔

پاکستان تحریک انصاف نے سینیٹ الیکشن کے لیے اپنے امیدواروں کا اعلان کردیا۔وزیراعظم کی زیر صدارت تحریک انصاف کے پارلیمانی بورڈ کا اجلاس ہوا جس میں سینیٹ انتخابات کے لیے امیدواروں کو فائنل کیا گیا اور وزیراعظم کی منظوری کے بعد حتمی ناموں کا اعلان کیا گیا۔ تحریک انصاف کی جانب سے سینیٹ الیکشن کے لیے پنجاب سے سیف اللہ نیازی، اعجاز چوہدری، عون عباس، علی ظفر اور ڈاکٹر زرقا کو امیدوار نامزد کیا گیا ہے۔سندھ سے فیصل واوڈا اور سیف اللہ ابڑو امیدوار ہوں گے۔

گرمیوں کی آمد سے قبل ہی عوام کو بجلی کے زوردار جھٹکے لگنے شروع ہوگئے،حکومت نے تین روز میں مسلسل تیسری بار بجلی کی قیمتیں بڑھا دیں۔وفاقی حکومت کی درخواست پر نیپرا نے بجلی ایک روپیہ 95 پیسے فی یونٹ مہنگی کرنے کی منظوری دے دی۔ فیصلے کا اطلاق 50 یونٹ تک والے غریب صارفین پر بھی یکساں ہو گا جس سے صارفین پر 200 ارب روپے کا اضافی بوجھ پڑے گا۔بجلی کا اوسط ٹیرف 14.38 سے بڑھ کر 16.33 روپے فی یونٹ مقرر کر دیا گیا ہے۔نیپرا کے مطابق کے الیکٹرک کے صارفین پر اس فیصلے کا اطلاق نہیں ہو گا ۔

پاکستان نے نجی کمپنیوں کو بغیر پرائس کیپس کے کورونا ویکسین درآمد کرنے کی اجازت دینے کا فیصلہ کیا ہے۔دستاویزات کے مطابق نیشنل ہیلتھ سروس، ریگولیشنز اینڈ کوآرڈینیشن ڈویژن نے ایسی درآمدات پر خصوصی استثنیٰ مانگا تھا۔غیرملکی خبررساں ادارے کی رپورٹ کے مطابق وزیراعظم عمران خان کی کابینہ نے اس تجویز کو منظوری دے دی ہے۔معان خصوصی برائے صحت فیصل سلطان نے کابینہ کے اس فیصلے کی تصدیق کردی ہے۔فیصل سلطان کا کہنا ہے کہ پاکستان میں عوام کو فری کورونا ویکسی نیشن کے بارے میں منصوبہ بندی جاری ہے۔

گزشتہ روز سے ایک ویڈیو وائرل ہورہی ہے مبینہ ویڈیو میں حکومتی حلقوں کی جانب سے بھاری رقم لیتے ہوئے دکھایا جارہا ہے جس کے بعد ایک ہنگامہ برپاہوگیا ہے کہ سینیٹ انتخابات کے حوالے سے ہارس ٹریڈنگ ہورہی ہے۔ بہرحال ویڈیو کے مصدقہ ہونے کی بات الگ ہے مگر ملک میں سینیٹ کی نشست کیلئے بولی لگانے کا سلسلہ طویل عرصہ سے چلتا آرہا ہے۔ کوئی سیاسی جماعت ایسی پارسا نہیں کہ اس نے ہارس ٹریڈنگ نہ کی ہو جو ہمارے یہاں کے کرپٹ نظام کی واضح مثال ہے۔ جب سیاست کے ایوانوں میں نمائندگان لانے کیلئے رقم کا استعمال ہو تو کیسے یہ امید کی جاسکتی ہے کہ ملک میں معاشی خوشحالی اور عوامی مسائل حل ہوسکتے ہیں۔